Përhapja e madhe e zjarreve si pasojë e erërave të forta në ishullin jugor grek, Kretë, i ka detyruar mijëra banorë dhe turistë të evakuohen, thanë zyrtarët të enjten.
Moti i nxehtë dhe i thatë në Greqi – që nuk është i pazakontë për këtë periudhë të vitit – e ka rritur rrezikun e përsëritjes së zjarreve verore që goditën vendin në vitet e fundit.
Në Kretë, rreth 5.000 njerëz janë evakuuar për shkak të zjarreve që shpërthyen mbrëmjen e së mërkurës, tha të enjten presidenti i Shoqatës Rajonale të Hoteleve për AFP.
Yorgos Tzarakis tha se rreth 3.000 turistë dhe 2.000 banorë janë larguar, kryesisht gjatë natës, si “masë paraprake” nga zonat pranë qytetit turistik të Ierapetras në Kretë.
Më herët, nënprefekti Yannis Androulakis i tha transmetuesit grek Mega se “evakuimet u kryen në shumë hotele dhe turistët u transferuan në mënyrë të sigurt në një palestër të mbyllur në komunën e Ierapetras”, në juglindje.
Autoritetet vepruan sepse avionët zjarrfikës nuk ia dolën të arrinin zonat e prekura gjatë natës, shtoi ai.
“Momentalisht, ka tri fronte aktive” tha Androulakis. “Për shkak të erërave të forta, zjarri ka përparuar me shpejtësi”.
Rreth 270 zjarrfikës, 10 helikopterë dhe dronë janë dërguar për t’i luftuar zjarret, tha Vassilios Vathrakoyannis, zëdhënës i shërbimit zjarrfikës.
Ekspertët thonë se ndryshimet klimatike të shkaktuara nga njeriu po shkaktojnë zjarre më të shpeshta dhe më intensive dhe katastrofa të tjera natyrore. /REL
Të paktën 102 persona kanë vdekur gjatë valës së parë ekstreme të të nxehtit në Spanjë për këtë vit, e cila filloi të shtunën.
Kështu sipas sistemit të monitorimit të vdekshmërisë së përditshme në Spanjë (MoMo), ndërsa vala e të nxehtit vazhdon të jetë në alarm në 12 nga 17 rajonet e Spanjës, me paralajmërime për temperatura ekstreme dhe stuhi shumë të forta lokale, raporton agjencia shtetërore meteorologjike Amet në faqen e saj të internetit.
Në gjashtë muajt që nga fillimi i vitit, sistemi MoMo ka regjistruar të paktën 380 vdekje në Spanjë që i atribuohen temperaturave të larta.
Në provincat e Andaluzisë, si Cordoba, Sevilla dhe Jaén, në jug të Gadishullit Iberik, ku alarmi është portokalli – për rrezik të konsiderueshëm – temperatura pritet të kalojë 42 gradë Celsius.
Ndërsa i nxehti anormal vazhdon të marrë jetë njerëzish, të paktën 4 në 48 orët e fundit, Amet parashikon kulme mes 38° dhe 39° në rajonin verior të Kastijës dhe Leonit, mbi 40° në rajonin qendror të Kastijës La Mancha dhe në Komunitetin e Madridit.
Vala e të nxehtit, shumë mbi mesataret sezonale dhe në nivele të paprecedenta për muajin qershor, e cila filloi të shtunën e kaluar, vazhdon gjithashtu në komunitetet autonome të Extremadurës, Kantabrisë, La Riojës, Asturiasit dhe Galicisë, në pjesën qendrore-veriore të gadishullit./TV21
Ministria e Punëve të Jashtme dhe Evropiane e Kroacisë (MVEP) u ka rekomanduar shtetasve të saj që t’i shtyjnë të gjitha udhëtimet jo të domosdoshme drejt Serbisë, raporton Radio Evropa e Lirë.
Në një njoftim të publikuar sot, Ministria u ka bërë thirrje qytetarëve kroatë për “kujdes të shtuar, ndjekje të situatës aktuale dhe informim më të detajuar para udhëtimit, sidomos në dritën e sjelljeve të papërshtatshme dhe të pabazuara nga ana e autoriteteve të Republikës së Serbisë ndaj shtetasve kroatë”.
“Duke marrë parasysh që shpesh ndodhin bllokime të rastësishme të rrugëve si pasojë e protestave qytetare, është e rëndësishme të kihet parasysh se është e pamundur të parashikohet gjendja në komunikacion dhe vështirësitë eventuale që mund të ndikojnë ndjeshëm në qarkullimin në të gjithë vendin. Qytetarëve kroatë u rekomandohet veçanërisht t’i shmangin vendet ku grumbullohet numër i madh njerëzish”, thuhet në njoftimin e MVEP-it.(INA)
Duke filluar nga dita e sotme (më 26 qershor), do të hapet afati për subjektet politike për të aplikuar për t’u certifikuar për pjesëmarrje në Zgjedhjet Lokale të 12 tetorit dhe për të dorëzuar listën me emrat e kandidatëve garues.
Zëdhënësi i KQZ-së, Valmir Elezi, ka treguar se kjo periudhë do të zgjasë 49 ditë.
“Duke filluar nga 26 qershori dhe deri më 13 gusht 2025, partitë politike, koalicionet, iniciativat qytetare dhe kandidatët e pavarur mund të paraqesin në KQZ, respektivisht Zyrën për Regjistrim, Certifikim dhe Kontrollin Financiar të Subjekteve Politike, kërkesën e tyre për t’u certifikuar për pjesëmarrje në Zgjedhjet për Kryetarë të Komunave dhe për Kuvendet Komunale, të cilat do të mbahen më 12 tetor 2025 dhe listën me emrat e kandidatëve për Kryetarë të Komunave dhe për Kuvendet Komunale”, tha ai.
Sipas KQZ-së, aplikimi do të mundësohet online për subjektet politike dhe mbetet në vullnetin e tyre të përcaktohen për llojin e zgjedhjeve që duan të marrin pjesë.
“Është krejtësisht në vullnetin e subjekteve politike që të përcaktohen se në cilat komuna duan të garojnë. Po ashtu, është në vullnetin e subjekteve politike që të zgjedhin nëse në një komunë të caktuar do të garojnë vetëm në zgjedhje për Kryetar Komune ose për Kuvend Komunal apo për të dyja së bashku”, tha Elezi për Rtk./Syri.net
Kreu i CIA-s thotë se një “trup i besueshëm inteligjence” tregon se programi bërthamor i Iranit është “dëmtuar rëndë” nga sulmet e fundit.
“Kjo përfshin inteligjencë të re nga një burim/metodë historikisht e besueshme dhe e saktë se disa objekte kryesore bërthamore iraniane u shkatërruan dhe do të duhej të rindërtoheshin gjatë viteve”, shtoi John Ratcliffe në një deklaratë për X.
Një raport i hershëm i inteligjencës amerikane u zbulua dje që sugjeronte se sulmet amerikane nuk shkatërruan komponentët kryesorë të programit bërthamor të Iranit, dhe e shtynë atë vetëm për disa muaj prapa.
Donald Trump e kundërshtoi raportin sot, duke theksuar se SHBA-të i kanë “zhdukur” vendet dhe e kanë shtyrë programin “dekada prapa”.
Sekretari i tij i Mbrojtjes, Pete Hegseth, pretendoi se kishte një “motiv politik” pas rrjedhjes së informacionit./Ina
Maqedonia po përballet me një valë të fuqishme të të nxehtit, ndërsa temperaturat gjatë ditës së sotme pritet të arrijnë deri në 41°C.
Sipas njoftimit të meteorologëve, moti do të jetë me diell dhe shumë i nxehtë, me vranësira të lehta lokale. Do të fryjë erë e dobët deri mesatare nga drejtimi i veriut, ndërsa pasdite parashikohen kushte për paraqitje të izoluar të motit jostabil.
Temperaturat minimale do të lëvizin nga 10 deri në 20°C, ndërsa maksimalet nga 33 deri në 41°C.
Në Shkup, moti do të jetë kryesisht me diell dhe shumë i nxehtë, me erë të lehtë veriore. Temperatura minimale do të jetë rreth 20°C, kurse ajo maksimale do të arrijë 41°C.
Parashikimi për ditët në vijim:
E premte: Moti mbetet shumë i nxehtë. Temperaturat do të jenë mbi 30°C në të gjithë vendin, ndërsa në disa rajone do të kalojnë 40°C.
Indeksi UV do të jetë 9, çka përfaqëson rrezikshmëri të lartë për lëkurën.
Pasdite dhe në mbrëmje: Parashikohen reshje lokale me shi të rrëmbyeshëm, bubullima dhe mundësi për stuhi të shoqëruara me erë të fuqishme dhe breshër.
Fundjava: Do të fryjë erë mesatare deri e fortë nga veriu, ndërsa temperaturat do të pësojnë rënie prej 5-7 gradësh krahasuar me ditën e premte.
Kujdes! Qytetarët këshillohen të shmangin ekspozimin në diell gjatë orëve të pikut (11:00 – 17:00), të konsumojnë shumë lëngje dhe të qëndrojnë në ambiente të freskëta.(INA)
Një zyrtar i lartë i Hamasit i tha BBC-së se ndërmjetësit ndërkombëtarë kanë shtuar përpjekjet për të arritur një armëpushim të ri dhe një marrëveshje për lirimin e pengjeve në Gaza, megjithatë bisedimet me Izraelin vazhdojnë të mbeten të bllokuara.
Deklaratat vijnë ndërsa Presidenti i SHBA-së, Donald Trump, shprehu optimizëm për progres në negociata.
“Mendoj se po bëhet përparim i madh në Gaza”, tha ai nga Brukseli të mërkurën, duke shtuar se dërguari i tij Steve Witkoff besonte se “Gaza është shumë afër” një marrëveshjeje.
Ndërkohë, situata në terren është përkeqësuar. Sulmet ajrore izraelite në Gaza vranë të paktën 45 palestinezë të mërkurën, sipas ministrisë së shëndetësisë të udhëhequr nga Hamasi, përfshirë edhe njerëz që po prisnin ndihma humanitare. Në të njëjtën kohë, shtatë ushtarë izraelitë u vranë në një sulm të Hamasit në Khan Younis.
Negociatat për armëpushim janë ngecur që nga fundi i majit, kur Hamasi refuzoi një propozim amerikan për një armëpushim 60-ditor në këmbim të lirimit të gjysmës së pengjeve të gjallë dhe atyre të vdekur. Aktualisht, 50 pengje izraelite mbahen ende në Gaza, nga të cilët të paktën 20 besohet të jenë gjallë.
Izraeli ka rifilluar ofensivën ushtarake në Gaza dhe ka vendosur një bllokadë të plotë të ndihmës humanitare që nga marsi, duke e lehtësuar atë vetëm pjesërisht pas presionit ndërkombëtar. Në përpjekje për të shmangur abuzimin me ndihmat, Izraeli dhe SHBA kanë krijuar një sistem të ri shpërndarjeje përmes Fondacionit Humanitar të Gazës (GHF), duke anashkaluar OKB-në.
Nga 26 maji e deri më sot, mbi 549 palestinezë janë vrarë dhe 4,000 janë plagosur gjatë përpjekjeve për të marrë ndihma. Të mërkurën, në Gazën qendrore dhe jugore u raportuan të paktën 14 vdekje si pasojë e zjarrit izraelit dhe sulmeve ajrore. Në qytetin e Gazës, u mbajtën funeralet për disa nga 33 viktimat e një dite të mëparshme./Ballkanweb
Gjenerali iranian Esmail Qaani, komandant i forcave Quds të Gardës Revolucionare Islamike të Iranit (IRGC), është shfaqur në publik gjatë një tubimi në Teheran për të festuar atë që autoritetet iraniane e quajtën “Operacioni Fitorja Hyjnore” kundër Izraelit.
Sipas agjencisë iraniane të lajmeve Tasnim, Qaani është parë në mesin e qytetarëve të mbledhur për të shënuar fitoren, ndërsa televizioni shtetëror Press TV publikoi pamje ku thuhet se ai u prit “ngrohtësisht nga qytetarë të entuziazmuar”.
Kjo paraqitje publike vjen vetëm disa javë pasi gazeta amerikane The New York Times raportoi se Qaani kishte humbur jetën gjatë një sulmi ajror izraelit mbi objektiva ushtarake dhe bërthamore në Iran. Ky raport u vu në dyshim menjëherë nga autoritetet iraniane, të cilat tani pretendojnë se pamjet e fundit janë prova e gjallë e të kundërtës./Ina
Presidenti i SHBA-së, Donald Trump, sapo ka kaluar disa nga orët më të turbullta të mandatit të tij të dytë – një thriller ndërkombëtar për luftën dhe paqen (me amerikanin në rolin kryesor). Dhe tani, me fillimin e samitit të NATO-s në Hagë, hapet një kapitull i ri. Trump paraqitet më vendimtar dhe më i sigurt se kurrë. Por a është edhe më besnik ndaj aleatëve?
Se çfarë ndodh kur gjërat nuk ecin sipas dëshirës së tij, Trump e tregoi me një shpërthim fjalësh ndaj Izraelit dhe Iranit – një “What the fuck” i drejtpërdrejtë. Ndërsa ka arritur suksesin e parë të jashtëm politik, përpjekjet për t’i dhënë fund luftës në Ukrainë kanë pësuar pengesa. Për këtë, ai e ka fajësuar vetë disa herë Presidentin ukrainas Volodymyr Zelenskyj (47).
Çfarë pritet pra nga një Trump i përforcuar në politikën ndërkombëtare? “BILD” ka pyetur dy ekspertë.
► Sipas Nadja Atwal, njohëse gjermane e Trumpit dhe producente e podcastit “Perceived Reality” në Wall Street, “asnjë president amerikan në historinë e afërt nuk ka vënë kaq pa kompromis forcën në shërbim të paqes.” Ajo e përshkruan doktrinën e re si: “Paqe përmes forcës, diplomaci pa iluzione dhe vija të kuqe të qarta për provokatorët si Teherani.”
Politologu Johnathan Cristol nuk është dakord: Ai nuk sheh një Trump të përqendruar në shërbim të paqes, por një president të “shfrenuar” dhe “të paparashikueshëm.” Në krizën e fundit në Lindjen e Mesme, Trump ka ndryshuar vazhdimisht qëndrimin dhe ka shqyrtuar publikisht opsionet e tij në rrjetet sociale në kohë reale.
Sipas Cristol, Trump ka vepruar pa një strategji të qartë dhe pa llogaritje të mirëfillta. “Kur për çdo problem mban çdo pozicion të mundshëm, në fund do të biesh edhe në një që njerëzit e shohin pozitivisht,” thotë ai
Profesori i politikës Jim Melcher nga Universiteti i Maine-Farmington vë në dukje se Trump “realizoi një kërcënim jashtëzakonisht të rrezikshëm me sulmin ajror ndaj objekteve bërthamore iraniane.” Kritikët më parë e tallnin me akronimin “TACO” – Trump Always Chickens Out (Trump gjithmonë tërhiqet në fund).
▶︎ Pas sulmit ndaj Iranit, “kërcënimet e tij tashmë duken shumë më të besueshme,” thotë Melcher. Kjo, sipas tij, e forcon Trumpin në negociatat e ardhshme.
Trumpi kënaqet në rolin e “udhëheqësit global”
Kjo shihet edhe nga sjellja e tij: Trump kënaqet në rolin e një lideri botëror dhe nuk ngurron të shpërthejë në zemërim ndaj atyre që nuk i binden. Vizitat e udhëheqësve botërorë në Zyrën Ovale – si Zelenskyj dhe Presidenti i Afrikës së Jugut Cyril Ramaphosa (72) – kanë rezultuar shpesh në “shuplaka verbale” përpara syve të botës.
Se Uashingtoni është më i ashpër, Trumpi e bëri të qartë pak para samitit të NATO-s, kur refuzoi ta konfirmojë në mënyrë të qartë angazhimin e SHBA-së ndaj nenit 5 të traktatit të NATO-s për mbrojtjen e përbashkët. Në vend të kësaj, tha vetëm se ishte i gatshëm të ndihmonte “miqtë.” Por kush janë miqtë e tij? Vetëm ai e di./Botasot
Çmimet e naftës ranë me gati 5% të martën pasi Izraeli ra dakord për një armëpushim me Iranin, pas gati dy javësh konflikti.
Nafta e papërpunuar Brent, pika referuese ndërkombëtare për çmimet e naftës, fillimisht ra në 68 dollarë për fuçi, megjithëse më pas u rikuperua disi pasi Irani dhe Izraeli akuzuan njëri-tjetrin për shkelje të armëpushimit brenda disa orësh.
Çmimet ishin rritur ndjeshëm ditët e fundit, ndërsa shqetësimet u rritën se Teherani mund të prishte furnizimet globale duke bllokuar Ngushticën e Hormuzit, një rrugë kyçe transporti për naftë dhe gaz.
Tregjet e aksioneve në SHBA, Mbretërinë e Bashkuar dhe Evropë u rritën dhe mbetën të qëndrueshme, pasi presidenti i SHBA-së Donald Trump i tha Izraelit në mediat sociale të mos hidhte bomba pasi ky i fundit akuzoi Iranin për shkelje të armëpushimit.
Vetëm disa orë më parë, Trump kishte deklaruar se armëpushimi ishte “tani në fuqi”, pas së cilës Izraeli konfirmoi se kishte rënë dakord për këtë veprim.
Çmimet e naftës janë rritur deri në 81 dollarë për fuçi që nga fillimi i sulmeve me raketa, duke nxitur frikën se kostoja e jetesës mund të rritet ndërsa shpenzimet e benzinës, naftës dhe biznesit u rritën.
Nafta bruto aktualisht tregtohet me 69.67 dollarë, pak më poshtë nivelit në të cilin ishte kur Izraeli nisi raketa kundër centraleve bërthamore të Iranit më 13 qershor.
“Nëse armëpushimi ndiqet siç u njoftua, investitorët mund të presin kthimin në normalitet të naftës”, tha Priyanka Sachdeva, analiste e lartë e tregut në Phillip Nova.
Por ajo shtoi se “shkalla në të cilën Izraeli dhe Irani i përmbahen kushteve të armëpushimit të shpallura së fundmi, do të luajë një rol të rëndësishëm në përcaktimin e çmimeve të naftës”.
Rënia e çmimeve u ngushtua ndërsa Izraeli pretendoi se Irani kishte shkelur armëpushimin, pasi akuzoi Teheranin për nisjen e një sulmi me raketa.
Tregjet e aksioneve në SHBA u hapën më lart. S&P 500 dhe Dow Jones Industrial Average ishin përpara gati 0.9%, ndërsa Nasdaq u rrit me më shumë se 1%.
Në Evropë, indeksi FTSE 100 i Mbretërisë së Bashkuar u rrit me 0.4%, ndërsa Dax i Gjermanisë u rrit me 1.7%. Në Azi, indeksi i aksioneve Nikkei i Japonisë u mbyll me 1.1%.
Konflikti në Lindjen e Mesme i kishte shtyrë çmimet globale të energjisë më lart, gjë që nëse do të vazhdonte do të kishte një efekt të mëtejshëm në faturat e energjisë dhe çmimet e benzinës.
Çmimet me shumicë të gazit në Mbretërinë e Bashkuar ranë me 12.5% të martën, pasi u rritën ndjeshëm. Katari është një furnizues kryesor i gazit natyror të lëngshëm, i cili transportohet përmes Ngushticës së Hormuzit.
Të hënën, Irani kishte lëshuar raketa në një bazë ushtarake amerikane në Katar, në hakmarrje për sulmet amerikane kundër centraleve bërthamore të Iranit.
Rritjet e fundit të çmimeve të naftës kishin çuar në frikë se rritja e kostove të energjisë mund ta bënte gjithçka – nga benzina dhe ushqimi deri te pushimet – më të shtrenjta në të gjithë botën, përfshirë Mbretërinë e Bashkuar.
Kjo është ajo që ndodhi pasi Rusia pushtoi Ukrainën tre vjet më parë, duke ndikuar në jetën e njerëzve në të gjithë globin./AlsatM
Newsal.de 