Pasi braktisi VLEN-nin, Arben Taravari po largohet edhe nga qeveria. ASH-ja ende pa i mbushur një vit në qeveri, vendosi të shkoj në opozitë. Këtë e vendosën mbrëmjen e së hënës pas mbledhjes së kryesisë qëndrore.
“Sollëm vendim që ASH të shkoj në opozitë. ASH krenarisht tregon se vitin e kaluar së bashku me partitë e VLEN-it arritëm që ta sjellim ndryshimin apo rotacionin politik te shqiptarët, por konstatimi ynë është që ky ndryshim fatkeqësisht nuk është ajo që e premtuam por vetëm një zëvendësim.”, tha Arben Taravari, kryetar i ASH-së.
Nga Koalicioni VLEN, pjesë e së cilës ishte edhe ASH në pushtet, thonë se ai doli në kundërshtim me veten. Nënkryetar i Lëvizjes BESA Blerim Sejdiu tha se ai ka pasur hisen më të madhe në koalicion.
“Ti je ministër i një qeverie që sot e kundërshton vetveten. Ke ardh në qeveri për të kundërshtuar vetveten dhe ky vërtetë është një fenomen dhe një talenti i rrallë. Për të ardh në qeveri që ta kundërshtosh vetveten është një talent i rrallë. Ti duhet të jesh i përmbajtur kur e thua se nuk është ajo që është pritur, sepse në takimet tona në VLEN ka kërkuar më shumë se gjithë hisen politike.”, shtoi Blermi Sejdiu, Nënkryetar i Lëvizjes BESA.
Ndërkaq, kreu i LD-së Izet Mexhiti i drejtohet Taravarit si zhgënjim i aktivistëve dhe gjithë shqiptarëve. Mexhiti iu bëri thirrje kuadrove dhe elektoratit të ASH-së që të kalojnë tek partia e sapoformuar VLEN.
“- Ti nuk e solle ndryshimin. Ti e pengove ndryshimin.
– Ti nuk po kthehesh tek populli. Ti po kthehesh tek lista e zezë.
– Ti nuk po e braktis Qeverinë. Ti e tradhëtove Qeverinë.
– Ti nuk e përfaqëson frymën e anëtarësisë së ASh-së. Ti e mashtrove anëtarësinë e ASh-së.
– Ti nuk je heroi i kësaj historie. Ti je dëshpërimi i çdo shqiptari… “, tha Izet Mexhiti, Kryetar i LD-së.
ASH vendimin për ta braktisur Qeverinë e morri një ditë pasi kryeministri Mickoski deklaroi se këtë javë do ta pijë kafen e fundit me Taravarin. Ndryshe partnerët e koalicionit qeverisës i dolën kundër Taravarit, që në momentin kur ai pranoi se ka kanale komunikimi me BDI-në./RTV21
Përfaqësues të partive politike kanë bërë të ditur se do t’i përgjigjen ftesës së presidentes Vjosa Osmani, për takimet me të cilat synohet t’i jepet zgjidhje ngërçit politik. Por shprehën pikëpamje të ndryshme nëse brenda Presidencës do të mund të gjetet zgjidhje.
Pozitivisht i janë përgjigjur përfaqësuesit e partive politike ftesës së presidentes Vjosa Osmani për takime, me synimin për ta zhbllokuar seancën konstituive.
Deputetja Mimoza Kusari Lila konfirmoi se kryetari i Lëvizjes Vetëvendosje, Albin Kurti, do të marrë pjesë në takim. Por, nuk shprehu pritje për marrëveshje në institucionin më të lartë të shtetit.
“Kryeministri Kurti dhe kryetari i LVV-së ka marrë ftesën dhe besoj se përgjigja është pozitive për pjesëmarrje në takim. Nënkuptohet se takimi ka të bëjë me konstituimin e Kuvendit, pasi nuk mundet që Zyra e Presidencës të përdoret, siç nuk është përdorur, për marrëveshja politike. Ato bëhen mes grupeve apo mes partive politike”, ka thënë deputetja Kusari-Lila, pas dështimit të 15-të të konstituimit të Kuvendit.
Më pas ajo ka përsëritur se Kurti është përfaqësues i LVV-së në këtë takim, dhe ka akuzuar partitë që në mandatin e shkuar ishin në opozitë se duke mos e votuar komisionin për votim të fshehtë për zgjedhjen e kryeparlamentarit, po e mbajnë peng konstituimin e Kuvendit.
Ndërkaq, kryetari i Partisë Demokratike, Memli Krasniqi, shprehu pritjen se në takim Vetëvendosja të reflektojë për situatën në Kuvend.
“Më vjen mirë që presidentja Osmani ka pranuar propozimin për të thirrur një takim të të gjitha partive politike, për çka shpresoj që të gjithë t’i përgjigjen pozitivisht për të shkuar dhe për të shprehur opinionet dhe për të pasur një diskutim që të rezultojë me një rrugë përpara për daljen nga kriza”, ka thënë Krasniqi.
E deputetja e Lidhjes Demokratike, Hykmete Bajrami, tha se nëse në takimin e organizuar nga presidentja kundërshtohet propozimi i LDK-së për Qeveri tranzicionale të spektrit të gjerë, atëherë i takon Vetëvendosjes të ofrojë alternativa të reja, krahas thirrjes për të bashkëqeverisur me LDK-në.
“Shpresoj që partitë politike të jenë prezentë në takimin e ftuar nga presidentja dhe nëse janë kundër propozimit tonë atëherë besoj janë ata që duhet të lëvizin. E kemi thënë sa herë, Vetëvendosja i ka edhe 13 parti të tjera parlamentare të cilave nuk iu ka bërë ofertë siç i ka bërë LDK-së. Janë ata që i kanë alternativat në dorë”, ka thënë deputetja Bajrami.
Kryetari i Aleancës për Ardhmërinë e Kosovës, Ramush Haradinaj, tha se nuk është i njoftuar me formatin e takimit dhe bëri të ditur se në të mund të japë ide për ta tejkaluar ngërçin politik.
“Do ta dëgjojmë presidenten, dhe të shohim se çfarë qëndrimesh ka ose çfarë sugjeron. Në të njëjtën kohë nëse kemi ndonjë sugjerim do ta japim”, ka potencuar Haradinaj.
Ftesë nga presidentja kanë pranuar vetëm përfaqësuesit e subjekteve politike të regjistruara në KQZ për zgjedhjet e 9 shkurtit. Për rrjedhojë, liderë të partive që kanë qenë pjesë e koalicioneve, si Fatmir Limaj që drejton Nismën Socialdemokrate, nuk janë ftuar.
“Unë jam linçuar para dy muajve kur kam thënë që për tema nacionale duhet të bisedohet me të gjithë dhe ju gjithmonë do ta keni një përgjigje timen pozitive. Sepse kjo është rruga, nuk ka rrugë tjetër. Me të gjitha ftesat që janë në funksion të bashkëbisedimit për të ndarë shqetësimet dhe brengosjen, për të gjetur zgjidhje ,në ftesa të tilla ne i përgjigjemi gjithmonë pozitivisht, pavarësisht nga kush vijnë ftesat”, ka thënë Limaj.
Por, skeptik për rezultatin e takimeve është shprehur ish-deputeti Afrim Kasolli, i cili ishte i ftuar në Specialen e KTV-së për vazhdimin e 15-të seancës konstituive.
“Nuk është në mandatin e saj që ta detyrojë dhe obligojë Lëvizjen Vetëvendosje të marrë një veprim të tillë sepse kjo është në vullnetin e saj politik. Jam pesimist dhe skeptik që do të mund të dalë diçka pozitive nga ky takim konsultativ. Nga situata mund të dilet vetëm nga veprimi i forcave politike në Kuvendin e Kosovës ose eventualisht nëse Gjykata Kushtetuese i jep një rekomandim të prerë nëse dikush e adreson këtë pyetje; nëse e drejta për nominim mund të kthehet në të drejtë për bllokim të Kuvendit të Kosovës”, ka thënë Kasolli.
Zyra e Presidencës ka njoftuar që serinë e takimeve konsultative rreth çështjes së konstituimit të Kuvendit do ta nisë nga e enjtja e 15 majit. E theksoi këtë, pasi javën e shkuar kumtoi lajmin për takimet, pas kërkesave që bënë disa parti politike.
Kjo nuk është nisma e parë për t’i dhënë zgjidhje ngërçit politik.
Kryeministri në detyrë, Albin Kurti, i cili është kryetar i Vetëvendosjes, parti kjo që ka marrë më së shumti vota në zgjedhje, ftoi në takim liderët e dy subjekteve kryesore politike, Memli Krasniqin që e drejton Partinë Demokratike, si dhe Lumir Abdixhikun, i cili është në krye të Lidhjes Demokratike. Ftesës iu përgjigj pozitivisht vetëm Krasniqi, por takimi nuk ka prodhuar rezultat.
Kurti i ka dërguar dy herë letër Abdixhikut, për negociata koalicioni. Ato janë refuzuar.
Por, në përgjigje të letrës së dytë, Abdixhiku ka propozuar qeveri tranzicioni me mandat deri në zgjedhjen e presidentit që bëhet në fillim të vitit të ardhshëm. Ideja është hedhur poshtë nga të gjitha subjektet politike.
Presidenca konfirmon pjesëmarrjen e partive në takim
Lëvizja Vetëvendosje (LVV), Partia Demokratike e Kosovës (PDK), Lidhja Demokratike e Kosovës (LDK) dhe Aleanca për Ardhmërinë e Kosovës (AAK) do të marrin pjesë në takimin konsultativ me presidenten Vjosa Osmani të enjten.
“Të gjithë e kanë konfirmuar pjesëmarrjen në takimin e së enjtes me presidenten Osmani”, ka njoftuar Presidenca të martën pasdite.
Liderët e partive më të mëdha parlamentare u ftuan nga Osmani për një takim lidhur me tejkalimin e ngërçit politik për konstituimin e Kuvendit.
Të martën është zhvilluar seanca e 15-të me qëllim konstituimi, por as këtë herë nuk përfundoi me sukses.
Seanca e radhës do të mbahet më 15 maj, të enjten – ditën e takimit të partive me Osmanin./Koha.net
Mbrëmja e së premtes shënoi përmbylljen e fushatës zgjedhore në Shqipëri, duke i hapur rrugën heshtjes elektorale që nisi në mesnatë dhe do të zgjasë deri në ditën e votimit më 11 maj.
Pas javësh të ngarkuara me premtime politike, tubime masive dhe retorikë të nxehtë, vendi ndodhet tani në një moment reflektimi, ku fokusi zhvendoset nga partitë te qytetari dhe zgjedhja e tij në kutinë e votimit.
Partia Socialiste përmbylli zyrtarisht fushatën e saj me një miting të madh pranë Parkut Olimpik në Tiranë.
Në të njëjtën kohë, koalicioni opozitar zhvilloi tubimin final në Bulevardin e Ri, duke dhënë mesazhin e fundit përpara betejës së votës.
Këtë të shtunë ndalohet çdo aktivitet politik publik, në përputhje me ligjin zgjedhor që garanton një ditë qetësie për qytetarët përpara ditës së zgjedhjeve.
Zgjedhjet e 11 majit janë historike jo vetëm për peshën e garës elektorale, por edhe sepse për herë të parë, diaspora shqiptare është përfshirë në procesin e votimit./Top Channel
Nesër pritet të mbahet seanca e 13-të, si tentim për konstituimin e Kuvendit. Seancat e mëparshme kanë dështuar për të zgjedhur Kryetarin e Kuvendit, kandidaten e propozuar nga Lëvizja Vetëvendosje, Albulena Haxhiun. Opozita ka kundërshtuar në ҫdo seancë zgjedhjen e Haxhiut si kryeparlamentare.
Nesër mbetet të shihet nëse pozita apo opozita do të dalin me një vendim tjetër që do t’i hapte rrugë krijimit të institucioneve.
Tashmë është bërë e ditur se ky ngërҫ politik ka bllokuar Kosovën në disa procese. Për shkak të situatës aktuale, Kosova nuk arriti të jetë pjesë e agjendës për t’u pranuar apo jo në Këshillin e Evropës. Mirëpo, njohësit e politikës numërojnë edhe humbje të tjera të Kosovës që mund të pësoj në rast se vazhdon me këtë situatë.
Njohësi i ҫështjeve politike, politologu Fahredin Majkovci në një prononcim për ‘Bota sot’, duke vlerësuar situatën aktuale, vlerëson se Kosova aktualisht ndodhet në një situatë të brishtë si me qytetarët ashtu edhe me partnerët ndërkombëtarë.
“Kuvendi i Kosovës është institucioni më i lartë përfaqësues dhe vendimmarrës në vend. Funksionimi i tij nuk është vetëm një çështje e brendshme e rendit demokratik, por edhe një ndër kriteret thelbësore për matjen e përparimit drejt anëtarësimit në Bashkimin Evropian. Dështimet e përsëritura për të mbajtur seanca efektive e kanë vendosur Kosovën në një pozitë të brishtë, si në raport me qytetarët e saj, ashtu edhe me partnerët ndërkombëtarë”, thotë ai.
Sipas tij, dështimet e Kuvendit për të dalë nga ky ngërҫ politik, do të kenë pasoja në tri drejtime.
“Këto dështime në gjykimi tim prodhojnë pasoja në tri rrafshe: Bllokimi legjislativ dhe ngërçi në reforma. Kjo jo vetëm që ndikon në performancën e institucioneve, por përkeqëson edhe perceptimin e Bashkimit Evropian ndaj përkushtimit të Kosovës për reforma; Humbja e besueshmërisë ndërkombëtare. Partnerët evropianë, përfshirë Komisionin Evropian dhe shtetet anëtare, ndjekin me vëmendje funksionimin demokratik të institucioneve në Kosovë. Bllokimi i Kuvendit si pasojë e përplasjeve politike, bojkoteve apo mungesës së kuorumit interpretohet si mungesë vullneti politik për të avancuar agjendën reformuese dhe dëmton kredibilitetin e Kosovës në arenën ndërkombëtare; Kostot për qytetarët. Në fund të ditës, humbësit më të mëdhenj janë qytetarët e Republikës së Kosovës”, vlerëson Majkovci.
Sipas tij, zgjidhja kërkon angazhim serioz e të koordinuar.
‘Është jetike që çështjet nacionale të mos bien pre e kalkulimeve partiake. Nevojitet aktivizim më i madh i presidentes si ndërmjetëse në rast të bllokimeve institucionale, si dhe rritje e presionit qytetar dhe medial për më shumë transparencë dhe përgjegjësi”, thekson ai.
Politologu Majkovci thotë se, vendimi i Parlamentit Evropian në rezolutën për Kosovën, është sinjal I rëndësishëm dhe një thirrje për përgjegjësi. AI thotë se politika duhet të ndaloj sabotimin e të ardhmes evropiane për interesa partiake.
“Për më tepër, Parlamenti Evropian ka miratuar rezolutën për Kosovën, ku ndër të tjera kërkohet edhe heqja e masave të BE-së ndaj vendit tonë. Ky është një sinjal politik i rëndësishëm, por edhe një thirrje për përgjegjësi. Kosova nuk ka luksin të humbasë më kohë. Çdo muaj pa seanca funksionale është një muaj më larg nga Bashkimi Evropian. Politika duhet të ndalë sabotimin e së ardhmes evropiane për interesa afatshkurtra e partiake”, tha ai./Botasot
Presidentja e Kosovës, Vjosa Osnani, tashmë ka shprehë gatishmërinë që nga data 16 prill, që t’i presë liderët e partive politike në rast se ata e shohin të nevojshme një gjë të tillë.
Këshilltari për media i presidentes, Bekim Kupina. ka njoftuar se së shpejti do të flasin me partitë politike për të parë se cila është koha e përshtatshme për të gjithë, për një takim gjithëpërfshirës.
”Deri dje nuk kemi pasur një kërkesë të tillë. Tani që disa parti kanë kërkuar që Presidentja t’i thërrasë në takim të përbashkët të liderëve, Kabineti i Presidentes do të kontaktojë së shpejti me partitë politike për të parë se cila është koha e përshtatshme për të gjithë, për një takim të tillë gjithëpërfshirës”, ka deklaruar këshilltari për media i presidentes, Bekim Kupina. /21Media
Deputetët kanë dështuar të konstituojnë Kuvendin e Kosovës edhe në përpjekjen e 12-të. Kryesuesi i seancës, Avni Dehari i LVV-së, sërish insistoi që zgjedhja e kryetarit të Kuvendit të ndodh përmes votimit të fshehtë.
Dehari kërkoi nga partitë politike të propozojnë emrat për formimin e komisionit verifikues, mirëpo PDK, LDK, Lista Serbe dhe AAK dhe Nisma nuk iu përgjigjen pozitivisht kësaj ftese.
Në sallë të pranishëm ishin 113 deputetë.
Seanca konstituive e Kuvendit të Kosovës ka nisur më 15 prill dhe procesi ka ngecur te zgjedhja e kryeparlamentarit pasi LVV-ja nuk po arrin të sigurojë 61 votat e nevojshme për kandidaten e tyre Albulena Haxhiu.
Seanca u ndërpre dhe Dehari tha se vazhdimi do të bëhet më 9 maj./GazetaTema
Udhëheqësi i Partisë CDU, Friedrich Merz, i vendosur të betohej si kancelari i ri i Gjermanisë, u zotua se të tre palët do të “do të shkonin me forcë në punë”.
Bashkimi politik konservator i Gjermanisë CDU/CSU dhe Social Demokratët e Qendrës së Majtë (SPD) janë nënshkruar në një marrëveshje koalicioni në Berlin, e cila hap rrugën që një qeveri e re të betohet të martën.
Udhëheqësi i Partisë CDU, Friedrich Merz, i vendosur të betohej si kancelari i ri i Gjermanisë, u zotua se të tre palët do të “do të shkonin me forcë në punë”.
“Ne e dimë se është detyrimi ynë pothuajse historik ta çojmë këtë koalicion drejt suksesit. Ne jemi të vendosur ta bëjmë këtë së bashku”, tha ai përpara nënshkrimit.
Motoja e marrëveshjes së koalicionit 144-faqesh është “përgjegjësi për Gjermaninë”, transmeton Telegrafi.
“Gjermania mund të zotërojë me sukses çdo detyrë më vete dhe në bashkëpunim të ngushtë me partnerët dhe miqtë tanë në botë”, thuhet në dokument.
Marrëveshja rinovon “premtimin e ekonomisë së tregut social – mundësi dhe prosperitet për të gjithë” dhe thotë se qeveria e re do të forcojë aftësitë e mbrojtjes së Gjermanisë për të mbrojtur lirinë dhe paqen.
Shërbimeve të Inteligjencës dhe Policisë do t’u jepen kompetenca të zgjatura dhe në rastin e disa veprave penale, shërbimeve të sigurisë do të lejohen të përdorin inteligjencën artificiale për të analizuar të dhënat e arritshme për publikun.
Partitë e koalicionit kanë njoftuar gjithashtu një “qasje të re, më të qëndrueshme ndaj politikës së migracionit”.
Plani është të pezullojë programet e pranimit vullnetar dhe ribashkimin e familjes. Për më tepër, azilkërkuesit duhet të largohen në kufi “në koordinim me partnerët evropianë”.
Një ligj i ri është planifikuar për policinë federale i cili do të bëjë të mundur aplikimin për ndalim në pritje të dëbimit për të huajt, që janë të detyruar të largohen nga vendi.
Legalizimi i pjesshëm i kanabisit i iniciuar nga qeveria e mëparshme do të “rishikohet hapur” në vjeshtë.
Në parathënien e marrëveshjes, palët riafirmojnë angazhimin e tyre për ekonominë e tregut social me qëllim krijimin e “mundësive dhe prosperitetit për të gjithë”.
Masat janë planifikuar për të zvogëluar kostot e energjisë, duke shpejtuar proceset e autorizimit dhe duke lehtësuar disa nga ngarkesat për themeluesit e kompanisë.
Në mes të periudhës legjislative, koalicioni po planifikon të lehtësojë barrën për të ardhura të vogla dhe të mesme duke zvogëluar taksën e të ardhurave.
Për më tepër, stimulimet tatimore duhet të krijohen për orë më të gjata pune. Një rivendosje e nivelit të zvogëluar të TVSH -së prej 7% për sektorin e hotelierisë është planifikuar nga viti 2026.
Dokumenti thotë se koalicioni është i angazhuar në Marrëveshjen e Klimës në Paris, dhe qëllimin për ta bërë klimën e Gjermanisë neutrale deri në vitin 2045.
Koalicioni gjithashtu po planifikon të shfuqizojë të ashtuquajturin Aktin e Ngrohjes, i cili u prezantua nën qeverinë e mëparshme, dhe ta zëvendësojë atë me një Akt të ri të Energjisë së Ndërtimit.
Kjo do të jetë më e hapur për teknologjinë, më fleksibël dhe më miqësore për përdoruesit, me fokus në uljen në mënyrë efektive të emetimeve të CO2. /Telegrafi/
Kryetari i Vetëvendosjes, Albin Kurti përmes një letre të dërguar në drejtim të Lumir Abdixhikut ka kërkuar që të bëjë koalicion me partinë që ai drejton, Lidhjen Demokratike të Kosovës. Në letrën e Kurtit, për tu takuar e për të folur si “politikanë të pjekur”, ai i thotë Abdixhikut se votuesit e tij do të preferonin një koalicion me VV-në, si dhe ata të VV-së një me LDK-në, shkruan Reporteri.net.
Kurti, i cili ditën e zgjedhjeve i quajti “hajvanat”, e gjatë fushatës nuk i konsideronte si të duhur për koalicion LDK-në, duke qenë se kishin qenë bashkë për 51 ditë në Kurti 1, në letër i kishte thënë Kryetarit të LDK-së se me të s’kishte pasur probleme në bashkëpunimin që kishin pasur, por problemi kishin qenë disa të tjerë që tani s’janë në pozitat e asaj kohe.
Gjithashtu, ai i përmend atij koalicionet e pasluftës.
LDK njihet si parti e cila nuk ka hezituar për koalicione qeverisëse: në 2001-2004 me PDK dhe AAK, në 2004-2007 me AAK, në 2008-2010 me PDK. Në 2014-2017 sërish me PDK, ndërkaq me LVV”, thuhet mes tjerash në letrën e Kurtit.
“Pse mos ta bëjmë?”, e pyet mes tjerash Kurti, Abdixhikun.
Por, për krejt këtë letër, kryetari i VV-së ende s’ka marrë një përgjigje nga Lumir Abdixhiku i LDK-së. Letra u publikuar të hënën, menjëherë pas dështimit të seancës konstituive, dhe i pyetur nga gazetarët, Abdixhiku tha se ende nuk e kishte parë, dhe se duhet trajtuar kjo çështje pa arrogancë.
Në një deklarim të dytë, të shkurtër para gazetarëve, ai theksoi se “qëndrimet e LDK-së tashmë i dini”, por që paralajmëroi se do ketë një deklarim zyrtar së shpejti.
Se ende s’i janë përgjigjur letrës së Kurtit, e tha të hënën mbrëma edhe nënkryetari i LDK-së, Lutfi Haziri, për të cilin me këtë letër është krijuar një rrethanë e re politike.
Por, pavarësisht kësaj, ai e cilësoi atë edhe si një goditje, me përmendjen që Kurti ka bërë për koalicionet.
“Duhet me prit që LDK me qenë e gatshme me reagu meqëm si çdoherë. Ne as nuk ngutemi, e as nuk vonohemi. Jemi duke e trajtu me seriozitet. LDK nuk vonohet, sepse kjo është situatë e ndjeshme”, deklaroi mbrëmë Haziri.
Gjermania i ka kërkuar Ukrainës të mos e pranojë propozimin e fundit të paqes të Donald Trump, duke e quajtur atë të ngjashëm me “kapitullim”.
Trump i ka propozuar Kievit të lëshojë territore të mëdha në këmbim të një armëpushimi me Rusinë.
Dhe ministri gjerman i Mbrojtjes, Boris Pistorius tha se ndërsa Ukraina e di se mund të duhet të ndahet nga një pjesë e territorit, ata “nuk duhet të shkojnë aq larg sa propozimi i fundit nga presidenti amerikan”, shkruajnë mediat e huaja, përcjell Telegrafi.
“Ukraina vetë mund të kishte marrë një vit më parë atë që përfshihej në atë propozim, është i ngjashëm me një kapitullim. Nuk mund të dalloj ndonjë vlerë të shtuar”, i tha ai transmetuesit publik gjerman ARD.
E ashtuquajtura “oferta përfundimtare” e Trump përfshin njohjen e Krimesë nga SHBA-ja si pjesë e Rusisë dhe njohjen jozyrtare të kontrollit rus të pothuajse të gjitha zonave të pushtuara që nga pushtimi i vitit 2022, raportoi Axios më parë këtë javë.
Gjithashtu, do ta ndalonte Ukrainën të bashkohej me NATO-n dhe do të hiqte sanksionet e vendosura ndaj Rusisë që nga viti 2014.
Deklarata e tij vjen ndërsa SHBA-të po e shqyrtojnë nëse do të vazhdojnë si ndërmjetës, siç ka thënë Marco Rubio.
Diplomati më i lartë i SHBA-së i tha rrjetit partner amerikan të Sky, NBC News, se “nuk mund të vazhdojmë t’i kushtojmë kohë dhe burime kësaj përpjekjeje nëse ajo (paqja) nuk do të realizohet”.
Ai tha se një marrëveshje duhet të arrihet së shpejti.
“Java e fundit ka qenë vërtet për të kuptuar se sa afër janë këto palë në të vërtetë dhe a janë ato mjaftueshëm afër saqë kjo meriton një investim të vazhdueshëm të kohës sonë si ndërmjetës”.
Megjithatë, Rubio nuk tha se sa gjatë është e gatshme administrata Trump të presë për një përparim. /Telegrafi/
Me pranimin e marrëveshjes e koalicionit me CDU-në dhe CSU-në, anëtarët e SPD-së hapën rrugën për qeverinë e re nën drejtimin e kancelarit Friedrich Merz.
Anëtarët e partisë social-demokrate SPD votuan pro marrëveshjes së koalicionit me CDU/CSU: Një përqindje e qartë prej 84.6 përqind e anëtarëve votuan për qeverinë e ardhshme të përbërë nga CDU/CSU dhe SPD.
Kryetari i SPD-së, Lars Klingbeil, do të jetë në qeverinë e re federale zëvendëskancelar dhe ministër i Financave. Presidiumi i SPD-së votoi për këtë njëzëri.
Klingbeil pritet të udhëheqë ekipin qeveritar të social-demokratëve dhe do të paraqesë deri të hënën listën e personelit për koalicionin e ardhshëm.
SPD-ja pësoi humbje të konsiderueshme në zgjedhjet federale dhe do të përfaqësohet me shtatë ministra në qeverinë e ardhshme.
Me pranimin e marrëveshjes së koalicionit me CDU-në dhe CSU-në anëtarët e SPD-së hapën rrugën për qeverinë e re mes CDU/CSU dhe SPD nën drejtimin e kancelarit të ardhshëm Friedrich Merz.
Zgjedhja e Merz-it dhe betimi i kabinetit në Bundestag janë planifikuar për të martën e ardhshme. /DW/
Newsal.de 