Ky është momenti i vrasjes së 29-vjeçarit Ermir Dedja, rreth mesnatës së të hënës, në lagjen numër 18 në Durrës. Video e siguruar nga Tv Klan është fiksuar nga një kamera në zonë, pak metra larg vendit ku u qëllua për vdekje i riu.
Viktima po lëvizte në këmbë në trotuar, kur automjeti tip Seat, që shihni në pamje, afrohet qetësisht dhe vrasësit e qëllojnë nga brenda tij.
Të shtënat dëgjohen dhe në videon e fiksuar nga kamerat e sigurisë. Në video shihen edhe dy persona, të cilët largohen me vrap nga vendngjarja duke komunikuar me njeri-tjetrin.
Pasi qëllojnë ndaj 29-vjeçari, i cili ndërroi jetë në spital, si pasojë e dy plumbave të marra në trup, autorët, që dyshohet se ishin të paktën dy, u larguan nga vendngjarja me të njëjtin automjet.
Vetëm pak orë më vonë, makina e përdorur prej tyre u gjet e djegur në fshatin Gërdec të Vorës.
“Kjo është gjithçka që ka mbetur nga automjeti tip Seat që përdorën autorët në vrasjen e Ermir Dedjes. Makina është dërguar për ekzaminim së bashku me kallashnikovin, që u gjet i djegur në brendësi të tij dhe që dyshohet se u përdor në vrasjen e 29-vjeçarit”, raporton gazetari Merin Maçi
Nga verifikimet rezultoi se makina lëvizte me targa të vjedhura pak kohë më parë në Prezë.
Ermir Dedja ishte një emër i njohur për policinë. Më herët ai kishte qenë i skeduar për çështje narkotikësh, por dhe për plagosje.
E shkuara e tij kriminale, por dhe ndonjë konflikt i mundshëm i kohëve të fundit, janë pistat ku po heton policia dhe Prokuroria e Durrësit, që deri tani kanë marrë në pyetje disa persona./Botasot
Një person plagosi disa persona me thikë në Bielefeld. Gazeta gjermane Bild bën të ditur se vitin e kaluar u regjistruan mesatarisht 79 sulme me thikë – në ditë.
Në qendër të Bielefeldit, një person plagosi disa persona me thikë në orët e para të mëngjesit të së dielës (18.05.2025). Policia arrestoi një të dyshuar në qytetin Heiligenhaus të hënën në mbrëmje. Ai është një sirian 35-vjeçar që ndodhet në Gjermani që nga gushti i vitit 2023 dhe ka një leje qëndrimi të përkohshme. Deri tani, ai nuk ishte i njohur për policinë.
I pandehuri dyshohet se sulmoi me thikë disa persona që po festonin para një kafeneje në qendër të Bielefeldit. Sipas informacioneve të deritanishme, të paktën pesë persona rreth moshës 22 dhe 27 vjeç u plagosën, katër prej tyre rëndë. Policia raportoi se të plagosurit nuk janë më në rrezik.
Shenja radikalizimi
Sipas informacionit nga media publike gjermane WDR, është e mundur që autori të jetë radikalizuar së fundmi dhe të ketë treguar interes për organizatën terroriste Shteti Islamik (IS). Policia nuk donte të komentonte ende për këtë. WDR gjithashtu ka informacion, se policia e vlerëson krimin në analizat e veta të brendshme si një sulm terrorist.
Policia gjatë një aksioniFotografi: Christian Müller/dpa/picture alliance
I dyshuari la një çantë në vendin e ngjarjes. Dyshohet se përmbante “dokumente personale, si dhe një shishe me një lëng të panjohur që mbante erë benzine”. Me sa duket, policia gjeti edhe thika, për të cilat nuk donin të jepnin informacione specifike.
Në një njoftim për shtyp, policia deklaroi se sfondi i krimit dhe motivi i mundshëm i autorit të krimit janë ende të panjohura. “Sipas njohurive aktuale, i dyshuari ka sulmuar rastësisht njerëz”, thuhet në raport, por hetimet po vazhdojnë.
79 sulme me thikë në ditë
Në numrin e së martës (20.05.2025), gazeta gjermane “Bild” citon të dhëna nga statistikat e krimit, sipas të cilave ka një mesatare prej 79 sulmesh në ditë në Gjermani. Kujtohet se në vitin 2024, policia në Gjermani regjistroi një total prej 29.014 vepra penale që lidhen me sulmet me thikëdhe se numri i lëndimeve të rënda me thikëështë rritur me 10,8 për qind krahasuar me vitin e kaluar.
Rainer Wendt (68), presidenti i Sindikatës së Policisë Gjermane, i tha gazetës “Bild” se “pragu për dhunë po bëhet gjithnjë e më i ulët” dhe se thikat po nxirren “tashmë në raste të parëndësishme dhe debate në dukje të padëmshme”.
“Bild” citon gjithashtu Udo Vetter, një avokat i specializuar në të drejtën penale, i cili paralajmëron, se “thikat janë bërë shoqërues të përditshëm për shumë njerëz”. Dhe shton: “Sidomos të rinjtë mbajnë një thikë në xhep sikur të ishte një telefon celular”. Kjo është arsyeja pse Rainer Wendt kërkon që veprimet parandaluese të fillojnë që në shkolla./DW
Britania e Madhe i ka pezulluar të martën bisedimet për tregti të lirë me Izraelin, e ka thirrur ambasadorin izraelit në takim protestues dhe ka vendosur sanksione të reja ndaj kolonëve izraelitë në Bregun Perëndimor, për shkak të ofensivës së re ushtarake të ushtrisë izraelite në Rripin e Gazës.
Ushtria izraelite njoftoi javën e kaluar fillimin e një operacioni të ri dhe kryeministri izraelit, Benjamin Netanyahu, tha se Izraeli do të marrë nën kontroll të gjithë Gazën.
Izraeli e ka ndaluar hyrjen e furnizimeve mjekësore, ushqimore dhe të karburantit në Gazë që nga fillimi i marsit, dhe ekspertë ndërkombëtarë kanë paralajmëruar për rrezikun e urisë masive si pasojë
Sekretari i Jashtëm britanik, David Lammy, tha se ofensiva nuk është mënyra për t’i kthyer pengjet e mbetura në Gazë, bëri thirrje për t’i dhënë fund bllokadës ndaj ndihmave dhe dënoi atë që e quajti “ekstremizëm” në disa departamente të Qeverisë izraelite.
“Nuk mund të qëndrojmë duarkryq përballë këtij përkeqësimi të ri. Kjo bie ndesh me parimet që qëndrojnë në themel të marrëdhënieve tonë dypalëshe”, tha Lammy para ligjvënësve.
“Sinqerisht, kjo është fyerje ndaj vlerave të popullit britanik. Prandaj, sot po njoftoj se kemi pezulluar bisedimet me këtë Qeveri izraelite për një marrëveshje të re tregtare”, shtoi ai.
Britania, në një komunikatë të përbashkët me Francën dhe Kanadanë të hënën, dënoi zgjerimin e operacioneve ushtarake të Izraelit në Gazë dhe kërkoi që të hiqen kufizimet ndaj ndihmës humanitare.
Këto tri vende thanë se do të ndërmarrin “veprime të tjera konkrete” nëse ofensiva e re e Izraelit nuk ndalet.
“Dua të deklaroj sot se jemi të tmerruar nga përshkallëzimi nga ana e Izraelit”, tha kryeministri britanik, Keir Starmer, në martën në Parlament.
“Ne përsërisim kërkesën tonë për një armëpushim si mënyra e vetme për t’i liruar pengjet; përsërisim kundërshtimin tonë ndaj vendbanimeve në Bregun Perëndimor dhe përsërisim kërkesën për një rritje masive të ndihmës humanitare në Gazë”, shtoi Starmer.
Britania gjithashtu sanksionoi disa individë dhe grupe në Bregun Perëndimor, për të cilët tha se ishin përfshirë në veprime të dhunshme ndaj palestinezëve.
Në vitin 2024, Britania vendosi sanksione ndaj një numri kolonësh dhe organizatash kolonësh, duke shënjestruar individë dhe grupe që sipas saj kishin sponsorizuar dhunën kundër komuniteteve palestineze në Bregun Perëndimor.
Shumica e vendeve i konsiderojnë të paligjshme vendbanimet hebraike të ndërtuara në tokat e pushtuara nga Izraeli gjatë luftës së Lindjes së Mesme në vitin 1967, dhe zgjerimi i tyre prej dekadash është një nga çështjet më të diskutueshme mes Izraelit, palestinezëve dhe komunitetit ndërkombëtar.
“Ne po tregojmë përsëri se do të vazhdojmë të veprojmë kundër atyre që kryejnë shkelje të rënda të të drejtave të njeriut”, tha Lammy.
Lufta tokësore dhe ajrore e Izraelit ka shkatërruar Gazën, duke zhvendosur pothuajse të gjithë popullsinë prej 2.3 milionësh dhe duke vrarë më shumë se 53.000 njerëz, sipas autoriteteve shëndetësore të Gazës.
Netanyahu ka thënë se vendi i tij është i përfshirë në një “luftë të civilizimit kundër barbarisë” dhe është zotuar se do të “vazhdojë të mbrohet me mjete të drejta deri në fitoren e përgjithshme”./REL
Presidentja e Kosovës, Vjosa Osmani, është kërcënuar me jetë. Në një email që është dërguar në adresën e Presidencës së Kosovës pak ditë më parë, presidentja është kërcënuar me jetë, duke u quajtur ndër të tjera edhe “kriminele antikushtetuese”. Adresa ishte anonime.
Këshilltari për media i Presidencës, Bekim Kupina, ka thënë se kërcënimi i fundit ishte vazhdimësi i kërcënimeve me jetë ndaj presidentes Osmani. Ai ka kritikuar institucionet e drejtësisë për mosveprim. Ai tha se janë bërë dhjetëra kërcënime, madje në shumë raste me emër e mbiemër, por s’ka pasur masa.
“Çfarë i bashkon të gjitha? Mosveprimi i institucioneve të drejtësisë”, ka thënë Kupina. “Përkundër dhjetëra kërcënimeve — shumica prej tyre kërcënime me jetë — asnjë veprim nuk është ndërmarrë ndaj kërcënuesve për vite me radhë. Kjo, edhe pse në shumicën e rasteve, kërcënimet bëhen me emër, mbiemër dhe nga profile të identifikueshme. Disa kërcënime janë bërë madje edhe në emisione televizive, por edhe atëherë kanë munguar veprimet për t’i përballur kërcënuesit me përgjegjësi”.
Kupina ka thënë se sipas institucioneve të sigurisë, është rasti i vetëm në historikun e institucioneve ku asnjë nga kërcënuesit nuk është përballur me drejtësinë.
“Rasti i kërcënimeve të njëpasnjëshme me jetë ndaj Presidentes dhe familjes së saj është i vetmi në historikun e institucioneve, siç na është thënë nga institucionet e sigurisë, ku asnjë nga kërcënuesit nuk është përballur me drejtësinë. Kur kërcënimet e rënda nuk trajtohen me seriozitetin që meritojnë, ato jo vetëm që nuk ndalen — përkundrazi, inkurajohen. Kjo klimë e rrezikshme nxit të tjerë të ndjekin të njëjtin model: nxitje dhune, thirrje për eliminim fizik dhe përçmim të plotë ndaj rendit kushtetues”, ka thënë Kupina. /Koha.net
Një ngjarje e rëndë ka ndodhur këtë të diel në zonën e Sukut, pranë Roskovecit, ku shembja e murit rrethues të një banese ka zënë poshtë një fëmijë.
Dyshohet se është shembur një mur rrethues në pronësi të shtetasit L. T.
Pas incidentit, e mitura është dërguar menjëherë në Qendrën Shëndetësore të Roskovecit. Mësohet se një vajzë e mitur 4-vjeçare ka humbur jetën si pasojë e kësaj ngjarjeje.
Grupi hetimor po punon për zbardhjen e rrethanave të ngjarjes./CNA
Në shkurt të vitit 2024, një aeroplan i Lufthansa-s fluturoi mbi Spanjë pa kontroll për dhjetë minuta. Kapiteni ishte në tualet, bashkëpilotit të tij i ra të fikët.
Kështu, siç raportojnë mediat gjermane, përcjell Telegrafi, thekson një raport hetimi i cili tani është i disponueshëm.
Sipas tyre, gjatë një fluturimi të Lufthansa-s nga Frankfurti për në Sevilje, bashkëpiloti i një Airbus A321 ra të fikët ndërsa kapiteni ishte në tualet.
Ky është rezultati i një raporti hetimor nga autoriteti spanjoll i hetimit të aksidenteve CIAIAC mbi incidentin e rëndë që ndodhi më 17 shkurt 2024.
Sipas raportit, aeroplani fluturoi për rreth dhjetë minuta pa një pilot kontrollues.
Kur u pyet, Lufthansa thjesht deklaroi se ishte në dijeni të raportit të hetimit.
Përveç kësaj, departamenti i sigurisë së fluturimit të Lufthansa-s kreu gjithashtu hetimin e vet të gjerë.
Megjithatë, kompania nuk i zbuloi rezultatet.
“Kërkojmë mirëkuptimin tuaj që nuk do të komentojmë përtej raportit të hetimit”, përfundonte deklarata e shkurtër me shkrim.
Siç theksohet më tej, edhe pse bashkëpiloti, i pavetëdijshëm, me sa duket i operoi pa dashje kontrollet, aeroplani ishte në gjendje të vazhdonte fluturimin në mënyrë të qëndrueshme falë autopilotit aktiv.
Zhurma të çuditshme
Gjatë atyre minutave, regjistruesi i zërit regjistroi zhurma të çuditshme në kabinën e pilotit që ishin në përputhje me një emergjencë akute shëndetësore, sipas raportit.
Vetëm rreth dhjetë minuta më vonë kapiteni arriti të hapte derën e sigurisë së kabinës së pilotit duke përdorur një kod emergjence.
Ai kishte përfunduar trajnimin për urgjenca të tilla vetëm një muaj më parë.
Ai u përpoq pa sukses të vendoste kodin normal të hapjes së derës pesë herë, gjë që shkaktoi një zhurmë në kabinën e pilotit.
Një stjuardesë u përpoq gjithashtu të kontaktonte bashkëpilotin duke përdorur telefonin në bord.
Ndërkohë, thuhet më tej, dyert e sigurisë, të projektuara për të parandaluar rrëmbimet e aeroplanëve nuk mund të hapen me forcë.
Më në fund, kapiteni shtypi një kod emergjence që lejonte hapjen e derës pa asnjë ndërhyrje nga kabina e pilotit.
Meqenëse bashkëpiloti ishte i zbehtë, djersiste shumë dhe bënte lëvizje të çuditshme, komandanti vendosi të ulej në Madrid.
Aeroplani u ul mirë atje me 199 pasagjerë dhe gjashtë anëtarë të ekuipazhit në bord.
Bashkëpiloti, i cili kishte marrë ndihmën e parë nga një mjek në bord, u dërgua menjëherë në spital.
Raporti tregon se as ekzaminimet e mëparshme mjekësore të 38-vjeçarit dhe as vetë personi nuk kishin ndonjë tregues të një gjendjeje para-ekzistuese.
Pyetja e vjetër e sigurisë u ngrit përsëri
Incidenti ngre pyetjen e vjetër të sigurisë nëse linjat ajrore duhet të rifusin vendosjen e vazhdueshme të dyfishtë të personelit në kabinën e pilotit.
Raporti i bën thirrje Agjencisë Evropiane të Sigurisë së Aviacionit (EASA) që të inkurajojë operatorët e linjave ajrore të rivlerësojnë udhëzimet përkatëse të sigurisë.
Aty këshillohet që një person i dytë i autorizuar të jetë gjithmonë i pranishëm në kabinën e pilotit nëse njëri prej dy pilotëve duhet ta lërë atë për të shkuar në tualet ose për detyra të tjera. /Telegrafi/
Policia gjermane po kërkon një burrë që sulmoi dhe lëndoi të paktën pesë persona në qytetin perëndimor të Bielefeldit herët të dielën.
Policia tha se tre viktima pësuan lëndime të rënda dhe po trajtohen në spitale të ndryshme, pasi i dyshuari i panjohur sulmoi festuesit para një bari në qendër të qytetit me një objekt të mprehtë dhe më pas u largua nga vendi i ngjarjes.
Më vonë ata thanë se nuk mund të përjashtonin mundësinë që më shumë njerëz të ishin lënduar në sulm, transmeton Telegrafi.
Agjencia gjermane e lajmeve dpa raportoi se festuesit ishin tifozë futbolli nga një ekip lokal, që mbrojtën veten kundër sulmuesit para se ai të largohej.
Klubi i futbollit Arminia Bielefeld i qytetit fitoi ndeshjen të shtunën dhe me të u bë kampion i divizionit të 3-të. Sipas policisë, sulmuesi ndoshta është lënduar në fytyrë.
Policia e Bielefeldit tha në një deklaratë se gjeti disa thika në vendin e sulmit, dhe se ka aktivizuar një linjë telefonike për dëshmitarë duke u kërkuar njerëzve të ngarkojnë video dhe foto të sulmit.
Ata paralajmëruan këdo që e sheh të dyshuarin të mbajë distancë dhe të telefonojë shërbimet e emergjencës, pasi burri mund të jetë i armatosur dhe i rrezikshëm. /Telegrafi/
Në tregjet Forex, vlera e dollarit kundrejt një shporte valutash u rrit për të katërtën javë radhazi, falë lehtësimit të tensioneve tregtare pasi dy shtetet më të fuqishme ekonomike botërore arritën një marrëveshje për uljen e përkohshme të tarifave për nëntëdhjetë ditë ndërkohë do të vazhdojnë negociatat tregtare.
Indeksi, i cili mat vlerën e dollarit amerikan kundrejt gjashtë monedhave kryesore botërore, u rrit 0.55 për qind javën e kaluar, në 100.98 pikë. Kursi i euros ra me 0.7 për qind, në 1.1165 dollarë. Monedha amerikane është forcuar edhe ndaj asaj japoneze, me 0.2 për qind, duke arritur në 145.65 jen.
Fundjavën e kaluar, Shtetet e Bashkuara të Amerikës dhe Kina arritën një marrëveshje për një ulje të përkohshme të tarifave reciproke gjatë negociatave në Zvicër. Sipas marrëveshjes, Shtet e Bashkuara të Amerikës uli tarifat për importet nga Kina nga 145 në 30 për qind dhe Kina uli tarifat për importet nga Shtetet e Bashkuara të Amerikës nga 125 në 10 për qind.
Mbështetja për dollarin u dha nga të dhëna të qëndrueshme ekonomike, veçanërisht nga raporti i inflacionit. Në muajin prill, çmimet e konsumit në SHBA nuk u rritën ndjeshëm, pavarësisht vendosjes së tarifave.
Analistët vlerësojnë se Fed do të ulë normat e interesit dy herë këtë vit, me 0.25 pikë përqindje secila, por vetëm në vjeshtë.
Drejtuesit e Fed kanë thënë se vendosja e tarifave mund të ngadalësojë rritjen ekonomike, ndërsa inflacioni mund të forcohet, ndaj të dhënat e ardhshme ekonomike duhet të priten përpara se të merret një vendim për normat e interesit./Botasot
Qeveria gjermane ka miratuar një paketë të re masash për përmirësimin e integrimit të të huajve që jetojnë në vend. Paketa, e quajtur “Programi i Ri për Integrim 2025”, përfshin:
Kurse falas të gjuhës gjermane deri në nivelin B2 për emigrantët që kanë më pak se 5 vite në Gjermani;
Pikë bonus për ata që ndjekin kurse ose punojnë në sektorë me mungesë fuqie punëtore, që do të ndihmojnë në përshpejtimin e procedurave për leje qëndrimi dhe nënshtetësi;
Qendra të reja të ndihmës ligjore dhe përkthimi në qytetet me përqendrim më të madh emigrantësh;
Mbështetje financiare për punëkërkuesit e huaj që ndjekin formim profesional (Ausbildung) në Gjermani.
Ministrja e Brendshme deklaroi se ky plan synon të thyejë barrierat për integrim dhe të ndihmojë emigrantët të bëhen pjesë aktive e shoqërisë gjermane.
Ky vendim u përshëndet nga organizatat për të drejtat e emigrantëve, por pati edhe kritika nga partitë konservatore që kërkojnë më shumë kontroll mbi sistemin e azilit.
Gjermania dhe Mbretëria e Bashkuar kanë njoftuar një marrëveshje të re strategjike për të bashkëpunuar në zhvillimin e armëve moderne, përfshirë sistemet e mbrojtjes ajrore dhe dronët ushtarakë. Ministrat e Mbrojtjes të të dy vendeve theksuan se ky bashkëpunim do të rrisë sigurinë evropiane përballë kërcënimeve në rritje dhe do të forcojë kapacitetet e NATO-s.
Në qendër të kësaj marrëveshjeje është zhvillimi i teknologjisë së përbashkët për raketat e gjeneratës së re dhe përmirësimi i sistemit të mbrojtjes ajrore “Arrow 3”, i cili tashmë është porositur edhe nga Gjermania. Po ashtu, do të ketë investime të përbashkëta në inteligjencën artificiale ushtarake dhe sigurinë kibernetike.
Ky hap vjen në një kohë me tensione të larta ndërkombëtare dhe synon të përforcojë pozitat e Evropës në industrinë e mbrojtjes, duke reduktuar varësinë nga furnizues të jashtëm.
Newsal.de 