Gjermania vazhdon të përballet me mungesë të theksuar të stafit në sektorë të rëndësishëm si gastronomia dhe mjekësia, duke hapur mundësi të reja punësimi edhe për shtetasit e huaj, përfshirë shqiptarët që jetojnë ose synojnë të vijnë në Gjermani.
Në sektorin e gastronomisë kërkohen kuzhinierë, ndihmës-kuzhinierë, kamarierë dhe staf shërbimi, ndërsa në mjekësi dhe kujdes shëndetësor nevoja është e madhe për infermierë, ndihmës-infermierë dhe staf mbështetës. Autoritetet gjermane dhe punëdhënësit po ofrojnë gjithnjë e më shumë kontrata të rregullta, Ausbildung dhe mundësi kualifikimi për ata që plotësojnë kushtet ligjore.
Ekspertët theksojnë se njohja bazë e gjuhës gjermane dhe dokumentacioni i rregullt janë elementë kyç për integrim të suksesshëm dhe stabilitet afatgjatë në tregun e punës.
📌 Njoftim për lexuesit
Nëse keni interes ose nevojë për aplikim në fushën e gastronomisë apo mjekësisë, për informacione rreth dokumenteve, procedurave apo vendeve të punës, mund të na kontaktoni direkt.
Një tjetër përpjekje për konstituimin e legjislaturës së nëntë të Kuvendit të Kosovës do të bëhet sot. Kjo do të jetë seanca e 22-të çdo 48 orë që nga 15 prilli. Hapat për konstituimin e legjislaturës së nëntë të Kuvendit kanë nisur më 15 prill, mbi një muaj më parë. Bllokada tashmë ka hyrë në muajin e dytë, shkruan gazeta online Reporteri.net.
VV në të gjitha seancat e fundit ka vazhduar me përpjekjen për ta ndryshuar formën e votimit për zgjedhjen e Kryetarit të Kuvendit në votim të fshehtë, për çka nuk ka marrë përkrahje.
Derisa dështimi për konstituimin e Kuvendit po vazhdon, partitë politike vazhdojnë ta akuzojnë njëra-tjetrën për bllokadën e krijuar.
Nga PDK, LDK dhe AAK thonë se Vetëvendosje e Albin Kurtit nuk i ka votat dhe e akuzojnë se e ka futur shtetin në izolim.
Kryeministri në detyrë, deputeti i Lëvizjes Vetëvendosje, Albin Kurti ka thënë DJE se “opozita” padrejtësisht po e pamundëson konstituimin e Kuvendit të Kosovës.
Sipas tij, nuk është në pyetje emri i kandidates së propozuar nga VV-ja për Kryeparlamentare, Albulena Haxhiu, por votimi i fshehtë.
“Albulena Haxhiu nuk është as në pyetje, as në pikëpyetje. E përgjigjja është votimi i fshehtë, për çfarë opozita padrejtësisht dhe me dëm për shtetin e Kosovës po e pamundësoj kuorumin”, tha Kurti, pas pjesëmarrjes në edicionin e 16të konferencës vjetore shkencore “Java e Albanologjisë”.
Javën e kaluar madje pati deklarata se janë ofruar poste në këmbim të votës për Albulena Haxhiun. Ishte deputetja boshnjake, Duda Balje ajo që ka konfirmuar se i kanë ofruar punë si profesoreshë në Maqedoni të Veriut, në këmbim të votës për zgjedhjen e Albulena Haxhiu Kryetare Kuvendi.
Balje tha se ka pasur 2-3 thirrje për këtë çështje, por se ka refuzuar duke e cilësuar këtë si të papranueshme.
“Po është e vërtetë. Pata disa thirrje, që s’janë persona direkt, të politikës. Janë shoqëri. Para disa vite kam apliku për vendin e profesoreshës në Maqedoni sepse kam shtetësinë e Maqedonisë dhe e flas mirë gjuhën. Kam plotësu krejt kushtet. Më s’kam apliku. Tash kanë thanë se ka mundësi me bisedu për vendin e punës”, ka thënë Balje të premten.
Nga Lëvizja Vetëvendosje nuk kanë dhënë sinjale se do të heqin dorë nga kandidatura e Albulena Haxhiut. Sinjale po ashtu nuk ka se do të hiqet dorë nga propozimi për ndryshimin e formës së votimit për zgjedhjen e Kryetarit të Kuvendit. E propozuara për këtë pozitë, Albulena Haxhiu, në asnjë nga votimet s’ka arritur të marrë mbi 57 vota. Për t’u zgjedhur i nevojiten 61.
Presidentja Osmani pas një takimi që kishte me krerët e partive politike, ka paralajmëruar se mund ta çojë këtë çështje në Kushtetuese, nëse nuk gjindet një zgjidhje. Ajo tha se këtë e ka përmendur edhe në takim dhe se s’ka pasur kundërshtim nga palët.
Tashmë janë bërë mbi tre muaj kur Kosova ka mbajtur zgjedhjet parlamentare, në të cilat Vetëvendosje doli partia e parë, e pasuar nga PDK, LDK dhe AAK-NISMA./Reporteri.net
Konstituimi i përbërjes së re të Kuvendit ka dështuar edhe në tentativë e 17-të. Kryesuesi u propozoi përfaqësuesve partiakë që mbledhjet t’i mbajnë më rrallë, së paku një herë në javë. Por, propozimin e kundërshtuan përfaqësuesit e partive që deri tash kanë qenë në opozitë, sipas të cilëve me të Vetëvendosja tregon se nuk e ka prioritet konstituimin.
Në tentativën e 17-të për ta konstituuar përbërjen e re të Kuvendit, është dhënë propozimi që deputetët të mblidhen më rrallë se çdo 48 orë. Reduktimin e takimeve në një herë në javë, për aq kohë sa zgjat seanca konstituive, e propozoi të shtunën kryesuesi Avni Dehari. Idenë ua dha përfaqësuesve partiakë në konsultën që e ftoi me ta, para se të niste vazhdimi i 17-të i seancës konstituive që ka nisur një muaj më parë.
“Para se të fillojmë me seancën konstituive, e shoh të nevojshme që të vijnë për një konsultim shumë të shkurtër përfaqësuesit e subjekteve politike”, tha kryesuesi.
Dehari nuk e gjeti konsensusin që e kërkoi për ta anashkaluar kërkesën e Rregullores së Kuvendit, sipas së cilës pauza mes vazhdimeve të seancës konstituive nuk mund të jetë më e gjatë se 42 orë.
Vazhdimi i së shtunës nisi me një minutë heshtje, në 26-vjetorin e zhdukjes me dhunë të veprimtarit Ukshin Hoti që ndodhej i burgosur në Serbi.
Pa deputetët e AAK-së që munguan dhe me deputetët e LVV-së që në sallën e Kuvendit u paraqitën me 40 minuta vonesë, Dehari vazhdoi me pikën e rendit të ditës, në të cilën ligjvënësit kanë ngecur që 9 seanca – formimin e Komisionit për ta menaxhuar votimin e fshehtë për kryeparlamentarin.
Ai kërkoi propozime nga subjektet politike që në tentimet paraprake nuk kanë dhënë emrat për anëtarë të komisionit. Njëjtë si herëve të tjera, PDK-ja, LDK-ja dhe Lista Serbe nuk propozuan anëtarë.
Në votim, 56 votat që ishin për nuk qenë të mjaftueshme për formimin e Komisionit me anëtarët e propozuar më herët, dhe seanca u ndërpre. Pas kësaj, 99 deputetët që u mblodhën në vikend me qëllimin për konstituim të legjislaturës së re, u kthyen prapa pa bërë gjë.
Idenë që vazhdimet e seancës të mbahen më rrallë, përfaqësuesit e partive që në mandatin e shkuar ishin në opozitë, e cilësuan shkelje dhe mesazh që partia fituese nuk do zgjidhje.
“Është krejtësisht e papranueshme që të bëhet një kërkesë e tillë për të shkelur rregulloren me vetëdije dhe e dyta kjo tregon se vullneti i tyre nuk është në asnjë mënyrë për të tentuar për të bërë zgjidhje apo për të lëvizur përpara”, u shpreh kryetari i PDK-së, Memli Krasniqi.
Interpretim të njëjtë i dha edhe deputetja e LDK-së, Hykmete Bajrami.
“Ne këtë e shohim indikacion shtesë që LVV-ja nuk është absolutisht e interesuar që ta bëjë konstituimin e Kuvendit. Ata mungesën e institucioneve të Kuvendit dhe të Qeverisë e kanë reduktuar në problem të mbledhjes çdo 48 orë të deputetëve”, ka thënë Bajrami.
Por, deputetja e koalicionit fitues, LVV-Guxo-Alternativa, Mimoza Kusari-Lila, tha se propozimi u bë si pasojë e mungesës së rezultateve nga vazhdimet që janë mbajtur çdo të dytën ditë.
“Në rast se janë të barrikaduar në ato pozicione dhe nuk e ndiejnë peshën e përgjegjësisë për të marrë pjesë në votim as për procedurë, le ta presim interpretimin e Gjykatës Kushtetuese. Se nuk është që po bëjmë ndonjë hair që po vijmë këtu çdo 48 orë, përderisa ata nuk po lëvizin nga pozicioni i tyre i mos votimit”, deklaroi Kusari-Lila.
Në PDK e LDK përsëritën se përgjegjësia për zhbllokim i takon LVV-së, subjekt ky që nuk e ka siguruar shumicën në Kuvend.
Kryetari i PDK-së, Krasniqi, tha se problemin nuk e kanë vetëm me emrin e Albulena Haxhiut për kandidate për kryeparlamentare.
“Partia Demokratike e Kosovës, përveç zonjës Haxhiu nuk do të votojë për asnjë propozim që mund të vijë si zëvendësim i saj e që është ish ministër i qeverisë Kurti II”, ka thënë ai.
E, ngërçi në Kuvend është produkt i kalkulimit të partive për zgjedhjet lokale të cilat mbahen kah fundi i këtij viti, ka thënë analisti Arbnor Sadiku.
I ftuar në “Specialen” e KTV-së për vazhdimin e 17-të të seancës konstituive, ai theksoi se Lëvizja Vetëvendosje mund të kalkulojë që me lokalet të organizohen edhe zgjedhjet e parakohshme nacionale.
“Lëvizja Vetëvendosje si duket nuk ka asgjë me urgjencë dhe është e interesuar të vazhdojë kësisoj për faktin që i ka levat e pushtetit në dorë dhe nuk i ngutet asgjë, kurse opozita është e fokusuar tashmë në zgjedhjet lokale dhe ka filluar përgatitjen e kandidaturave për kryetarë komunash dhe siç po shihet jemi në një skenar ku praktikisht Lëvizja Vetëvendosje do ta zvarrisë situatën për aq sa është e mundur dhe kësisoj kur të vijmë te zgjedhjet lokale mund të kemi edhe shpalljen e zgjedhjeve të jashtëzakonshme”, ka thënë Sadiku.
Sipas tij, historia ka treguar se në mungesë të vullnetit politik për të dalë nga bllokada, presioni ndërkombëtar për zgjidhje ka qenë shpesh faktor vendimtar.
“Po të na liheshin neve nuk do të dinim dhe nuk do të donim t’i bënim, siç po ndodh aktualisht. Fatkeqësisht Kuvendi i Kosovës po duket sikurse sokaku i të marrëve në romanin e Kadaresë ku njerëzit që kalojnë andej janë vërtet të marrë dhe kuvendin e kanë shndërruar në të tillë, ku nuk ka asnjë zgjidhje politike për zhbllokim të situatës”, ka thënë ai.
Në mungesë të zgjidhjes, presidentja Vjosa Osmani nuk e ka përjashtuar mundësinë që t’i drejtohet Gjykatës Kushtetuese. E në këtë gjykatë, ditë më parë e ka deponuar një kërkesë AAK-ja.
Pavarësisht procedurës në gjykatë, seanca do të vazhdojë çdo 48 orë. Vazhdimi i radhës do të mbahet të hënën në orën 10:30./Koha.net
As vazhdimi i së enjtes i seancës së nisur më 15 prill nuk ka prodhuar rezultat. PDK-ja, LDK-ja, Lista Serbe dhe AAK-Nisma nuk propozuan kandidatë për anëtarë të komisionit për votim të fshehtë siç ka kërkuar Vetëvendosje. Pa votat e tyre nuk është bërë as kuorumi i nevojshëm. Pas ndërprerjes së seancës, partitë deri dje në pushtet e opozitë kanë akuzuar sërish njëra-tjetrën për ngërçin e krijuar.
Më pak se 3 minuta ka zgjatur vazhdimi i 16-të i seancës konstituive që ka nisur fiks një muaj më parë. Para se të vazhdonte seanca të enjten, administrata u vendosi në tavolinë të gjithë deputetëve nga një shkresë me njoftimin e Gjykatës Kushtetuese lidhur me kërkesën e AAK-së të deponuar në fillim të kësaj jave.
Me këto letra u kërkohej ligjvënësve që më së largu deri më 19 maj, t’i dërgojnë në Kushtetuese komentet e tyre lidhur me kërkesën e AAK-së për vlerësimin e kushtetutshmërisë së vendimit për mosvotimin e Komisionit për votim të fshehtë.
Pas pak, seanca nisi por dështoi pikërisht në pikë-propozimin për ta formuar Komisionin për zhvillimin e votimit të fshehtë.
Sërish, PDK-ja, LDK-ja, Lista Serbe dhe AAK-Nisma nuk propozuan kandidatë për anëtarë të këtij Komisioni. Pa votat e tyre as nuk u bë kuorumi i nevojshëm që të miratohet apo kundërshtohet formimi i tij.
“55 deputetë kanë votuar për, 1 ka qenë kundër, abstenime nuk ka. Shihemi më 17 maj në orën 10:30”, u ka thënë deputetëve kryesuesi i seancës, Avni Dehari.
Ndonëse kjo është hera e 8 që seanca dështon në pikën e njëjtë, përfaqësues të koalicionit LVV-Guxo-Alternativa, thanë se vazhdimisht janë duke bërë përpjekje për zhbllokim.
Sipas koalicionit fitues, nuk po dështon Albulena Haxhiu që të zgjidhet kryeparlamentare por po dështon mënyra e votimit të saj.
“Ne ende nuk kemi ardhur tek propozimi i emrit. Ajo që na duhet prej numri të konsiderueshëm të seancave, përpjekja jonë e vazhdueshme është që ne ta kemi një proces të votimit të fshehtë”, ka deklaruar deputeti i LVV-së, Faton Peci.
Por, kryetari i PDK-së, Memli Krasniqi, dështimin ia atribuoi kryetarit të Vetëvendosjes Albin Kurtit. Ai i bëri thirrje LVV-së që ta ndërrojë kandidaten për kryeparlamentare.
“Sot, 55 vota i ka marrë Albin Kurti, nuk i ka marrë Komisioni. Ata mund ta quajnë si të duan por këto janë votat për mandatin e Albin Kuritt. Andaj ne nuk kemi vota për të e as s’do të kemi. As për Albulena Haxhiun. Ky taktizim ta quaj butë, ka ndodhur thjeshtë për ta komplikuar situatën tutje”, ka thënë Krasniqi.
Deputetja e LDK-së, Hykmete Bajrami ka thënë se zgjedhja e kryetarit të Kuvendit siç po synon të bëjë Vetëvendosje, pa marrëveshje politike, mund të jetë strategji e saj.
“Kjo mund të shihet si interpretim i tillë që këta duan fillimisht ta zgjedhin kryetarin e Kuvendit dhe pastaj me këdo që bëjnë marrëveshje politike të ndajnë pjesën tjetër të pushtetit”, ka deklaruar ajo.
E dështimi i serishëm i seancës, sipas deputetes së AAK-së, Time Kadrijaj është dëshmi se Vetëvendosje nuk dëshiron të dilet nga ngërçi i krijuar në Kuvend.
“Këta janë lidhur me një emër që nuk po kalon dhe nuk po merr më shumë se 55 vota dhe këta nuk po tentojnë as të ndryshojnë dhe as të provojnë se a ka ndodnjë kandidat tjetër që i plotëson kushtet që ndoshta ish votu edhe prej partive të tjera parlamentare”, ka thënë Kadrijaj.
Pas dështimit të seancës, përfaqësuesit politikë kanë thënë se presin që situatës t’i gjendet zgjidhje në takimin që pasoi me presidenten Vjosa Osmani, por as në të nuk pati zgjidhje./Koha.net
Gjermani, 9 Maj 2025 – Komuniteti shqiptar në Gjermani po njeh një rritje të ndjeshme si në numër ashtu edhe në ndikim. Me mijëra shqiptarë nga Shqipëria, Kosova, Maqedonia e Veriut dhe Lugina e Preshevës kanë zgjedhur Gjermaninë për të ndërtuar një jetë më të mirë – dhe suksesi nuk ka munguar.
Sipas të dhënave të fundit, shqiptarët përfaqësojnë një nga grupet më aktive të emigrantëve në fushat si ndërtimi, gastronomia, teknologjia, por edhe shëndetësia. Një numër i madh të rinjsh po ndjekin shkollime profesionale (Ausbildung), ndërsa shumë të tjerë po hapin biznese të tyre.
Sfidat mbeten të shumta, si gjuha, integrimi dhe burokracia, por edhe këtu, solidariteti mes shqiptarëve është treguar thelbësor. Grupet në rrjete sociale, organizatat kulturore dhe qendrat e komunitetit janë kthyer në ura bashkëpunimi dhe ndihme për të rinjtë që sapo mbërrijnë.
🔹 “Shqiptarët në Gjermani janë punëtorë dhe të përkushtuar. Ata po kontribuojnë ndjeshëm në zhvillimin ekonomik të vendit dhe po përfaqësojnë denjësisht kulturën tonë,” – thotë një përfaqësues i komunitetit në Bavari.
Në të njëjtën kohë, nevoja për informim të saktë dhe mbështetje ligjore mbetet e lartë, ndaj portale si Newsal.de kanë një rol të rëndësishëm për të qenë zëri i këtij komuniteti.
Deputetët do të tentojnë edhe sot ta konstituojnë Kuvendin e Kosovës.
Ata të mërkurën kanë dështuar të konstituojnë Kuvendin në përpjekjen e 12-të. Kryesuesi i seancës, Avni Dehari i LVV-së, sërish insistoi që zgjedhja e kryetarit të Kuvendit të ndodh përmes votimit të fshehtë.
Dehari i LVV-së kërkoi nga partitë politike të propozojnë emrat për formimin e komisionit verifikues por partitë e tjera nuk iu përgjigjen pozitivisht kësaj.
Në sallë të pranishëm ishin 113 deputetë.
Seanca u ndërpre në mungesë të kourumit për formimin e komisionit verifikues për zgjedhjen e kryetarit të Kuvendit në formë të fshehtë.
Për ndryshimin e formës së votimit të kryeparlamentarit kanë votuar vetëm 56 deputetë, një votë kundër, ndërsa të tjerët nuk morën pjesë në votim fare.
Dehari tha se vazhdimi i seancës do të bëhet më 9 maj.
Seanca konstituive e Kuvendit të Kosovës ka nisur më 15 prill dhe procesi ka ngecur te zgjedhja e kryeparlamentarit pasi LVV-ja, në koalicion me Guxo dhe Alternativa, nuk po arrin të sigurojë 61 votat e nevojshme për kandidaten e tyre, Albulena Haxhiu./RTV21
Nesër pritet të mbahet seanca e 13-të, si tentim për konstituimin e Kuvendit. Seancat e mëparshme kanë dështuar për të zgjedhur Kryetarin e Kuvendit, kandidaten e propozuar nga Lëvizja Vetëvendosje, Albulena Haxhiun. Opozita ka kundërshtuar në ҫdo seancë zgjedhjen e Haxhiut si kryeparlamentare.
Nesër mbetet të shihet nëse pozita apo opozita do të dalin me një vendim tjetër që do t’i hapte rrugë krijimit të institucioneve.
Tashmë është bërë e ditur se ky ngërҫ politik ka bllokuar Kosovën në disa procese. Për shkak të situatës aktuale, Kosova nuk arriti të jetë pjesë e agjendës për t’u pranuar apo jo në Këshillin e Evropës. Mirëpo, njohësit e politikës numërojnë edhe humbje të tjera të Kosovës që mund të pësoj në rast se vazhdon me këtë situatë.
Njohësi i ҫështjeve politike, politologu Fahredin Majkovci në një prononcim për ‘Bota sot’, duke vlerësuar situatën aktuale, vlerëson se Kosova aktualisht ndodhet në një situatë të brishtë si me qytetarët ashtu edhe me partnerët ndërkombëtarë.
“Kuvendi i Kosovës është institucioni më i lartë përfaqësues dhe vendimmarrës në vend. Funksionimi i tij nuk është vetëm një çështje e brendshme e rendit demokratik, por edhe një ndër kriteret thelbësore për matjen e përparimit drejt anëtarësimit në Bashkimin Evropian. Dështimet e përsëritura për të mbajtur seanca efektive e kanë vendosur Kosovën në një pozitë të brishtë, si në raport me qytetarët e saj, ashtu edhe me partnerët ndërkombëtarë”, thotë ai.
Sipas tij, dështimet e Kuvendit për të dalë nga ky ngërҫ politik, do të kenë pasoja në tri drejtime.
“Këto dështime në gjykimi tim prodhojnë pasoja në tri rrafshe: Bllokimi legjislativ dhe ngërçi në reforma. Kjo jo vetëm që ndikon në performancën e institucioneve, por përkeqëson edhe perceptimin e Bashkimit Evropian ndaj përkushtimit të Kosovës për reforma; Humbja e besueshmërisë ndërkombëtare. Partnerët evropianë, përfshirë Komisionin Evropian dhe shtetet anëtare, ndjekin me vëmendje funksionimin demokratik të institucioneve në Kosovë. Bllokimi i Kuvendit si pasojë e përplasjeve politike, bojkoteve apo mungesës së kuorumit interpretohet si mungesë vullneti politik për të avancuar agjendën reformuese dhe dëmton kredibilitetin e Kosovës në arenën ndërkombëtare; Kostot për qytetarët. Në fund të ditës, humbësit më të mëdhenj janë qytetarët e Republikës së Kosovës”, vlerëson Majkovci.
Sipas tij, zgjidhja kërkon angazhim serioz e të koordinuar.
‘Është jetike që çështjet nacionale të mos bien pre e kalkulimeve partiake. Nevojitet aktivizim më i madh i presidentes si ndërmjetëse në rast të bllokimeve institucionale, si dhe rritje e presionit qytetar dhe medial për më shumë transparencë dhe përgjegjësi”, thekson ai.
Politologu Majkovci thotë se, vendimi i Parlamentit Evropian në rezolutën për Kosovën, është sinjal I rëndësishëm dhe një thirrje për përgjegjësi. AI thotë se politika duhet të ndaloj sabotimin e të ardhmes evropiane për interesa partiake.
“Për më tepër, Parlamenti Evropian ka miratuar rezolutën për Kosovën, ku ndër të tjera kërkohet edhe heqja e masave të BE-së ndaj vendit tonë. Ky është një sinjal politik i rëndësishëm, por edhe një thirrje për përgjegjësi. Kosova nuk ka luksin të humbasë më kohë. Çdo muaj pa seanca funksionale është një muaj më larg nga Bashkimi Evropian. Politika duhet të ndalë sabotimin e së ardhmes evropiane për interesa afatshkurtra e partiake”, tha ai./Botasot
Deputetët kanë dështuar të konstituojnë Kuvendin e Kosovës edhe në përpjekjen e 12-të. Kryesuesi i seancës, Avni Dehari i LVV-së, sërish insistoi që zgjedhja e kryetarit të Kuvendit të ndodh përmes votimit të fshehtë.
Dehari kërkoi nga partitë politike të propozojnë emrat për formimin e komisionit verifikues, mirëpo PDK, LDK, Lista Serbe dhe AAK dhe Nisma nuk iu përgjigjen pozitivisht kësaj ftese.
Në sallë të pranishëm ishin 113 deputetë.
Seanca konstituive e Kuvendit të Kosovës ka nisur më 15 prill dhe procesi ka ngecur te zgjedhja e kryeparlamentarit pasi LVV-ja nuk po arrin të sigurojë 61 votat e nevojshme për kandidaten e tyre Albulena Haxhiu.
Seanca u ndërpre dhe Dehari tha se vazhdimi do të bëhet më 9 maj./GazetaTema
Ka dështuar për herë të nëntë përfundimi i seancës konstituive. Por, në këtë seancë është propozuar që votimi për kryepalamentar të bëhet në formë të fshehtë, çka u kundërshtua ashpër nga partitë e tjera, të cilat nuk morën pjesë në votim.
Pas tetë dështimesh radhazi për të konstituuar Kuvendin e Kosovës, duke votuar me ngritje dore, një ide tjetër për të kaluar këtë ngërç, u propozua sot në tentimin e nëntë nga Lëvizja Vetëvendosje.
Kryesuesi i seancës, Avni Dehari tha se pas dështimeve për të votuar Albulena Haxhiun si kryeparlamentare, kanë zgjedhur të ndryshojnë formën e votimit, duke mos votuar në mënyrë të hapur.
“Bazuar në Rregulloren e Kuvendit, që parasheh edhe votimin e fshehtë dhe me qëllim të hapjes rrugë të zhbllokimit të procesit besoj se forma e duhur që mund t’i hap rrugë është votimi i fshehtë me fletëvotime fizike. E ftoj administratën që të bëjë përgatitjen e nevojshme për realizimin e këtij procesi të votimit”, ka thënë Dehari.
Por, kjo mënyrë e votimit u kundërshtua nga të gjitha partitë, përveç Lëvizjes Vetëvendosje dhe Partia Demokratike turke e Kosovës.
Memli Krasniqi, kryetar i PDK-së tha se ky vendim është i papranueshëm duke treguar se nuk do të marrin pjesë në votim.
“Kjo është e paprecedent nuk ka ndodhur sikur të kishit vendosur ndoshta edhe do të ishte e pranueshme, kjo nuk është e pranueshme iu ftoj të mos e thelloni krizën, por të dilni nga kriza sepse iu takon ta propozoni dikë që njëmend i merr votat dhe ju e dini që ka në mesin tuaj të tillë. Andaj mos e thelloni krizën, zhbllokojeni, sepse nuk meritojnë qytetarët e Kosovës për shkak të tekeve tuaja me kthye Kuvendin në cirk. Nëse doni ta thelloni, e thelloni tutje, e dini që po kërkoni precedent antikushtetues, e dini që në rastin pamundshëm që e keni me rrëzua, iu rrëzohet në të ardhmen. Ne nuk marrim pjesë në një votim të tillë imponues as nuk propozojmë komision, ne do t’iu vëzhgojmë dhe do t’iu shohim dhe do të bëhemi dëshmitarë”, ka thënë Krasniqi.
Arbitrar e të paprecedent e vlerësuan edhe nga LDK-ja, të cilët paralajmëruan se nëse ndodh një gjë e tillë, do t’i adresohen edhe Gjykatës Kushtetuese.
“Kjo që po bëni është arbitrare, shkelje e Kushtetutës dhe rregullores. Ndryshimi i mënyrës së otimit në proces nuk ka ndodhur asnjë herë dhe ne nuk do të bëhemi asnjëherë pjesë e shkeljeve të juaja. Është e vërtet se rregullorja nuk lejon debat në seancë konstituive, por gjithashtu në asnjë pikë të rregullores nuk thuhet se mundesh me ndryshu mënyrën e votimit kur je në proces. Nëse ju do të procedoni kjo lëndë do të dërgohet në Gjykatë Kushtetuese”, ka thënë Bajrami.
Cirk politik situatën e krijuar, e ka quajtur Time Kadrijaj e cila edhe e riktheu në vëmendje një bisedë të Mimoza Kusarit me Milan Radoiciqin, tashmë i kërkuar edhe për krime lufte e sulmin në Banjskë.
“Kjo që po ndodh këtu është për keqardhje. Aleanca ka dhënë alternativa dhe ju nuk i keni marrë parasysh ato. Andaj ne nuk do të bëhemi pjesë e cirkut të juaj. Sa për buzëqeshje të juaja po iu rikujtoj zdarvo Mimoza”, ka thëën Kadrijaj.
Vazhdimi i nëntë i seancës është përmbyllur pas dështimit të votimit për formim të komisionit për votim të fshehtë, për t’u rikthyer deputetët në vazhdim të seancës pas 48 orësh ose të shtunën në orën 10.Dukagjini
Newsal.de 